Mark 7

Ukuhlanzeka Lokungahlanzeki

1AbaFarisi labanye abafundisi bomthetho ababesuka eJerusalema babuthana kuJesu

2babona abanye abafundi bakhe besidla ukudla ngezandla “ezazingahlanzekanga”, okutsho ukuthi zingageziswanga. 3(AbaFarisi labaJuda bonke kabadli bengagezanga izandla zabo ngokomthetho, belandela isiko labadala. 4Nxa bevela emsikeni kabadli bengaqalanga bageza. Balandela amasiko amanengi, njengokugezisa amankomitsho, izindiwo lamagedlela.)

5Yikho abaFarisi labafundisi bomthetho bambuza uJesu bathi, “Kungani abafundi bakho bengalandeli amasiko abadala bangadli ukudla kwabo ngezandla “ezingahlanzekanga” na?

6Waphendula wathi, “U-Isaya wayeqinisile lapho aphrofitha ngani, lina bazenzisi; njengoba kulotshiwe ukuthi: “Abantu laba bangidumisa ngezindebe zabo, kodwa izinhliziyo zabo zikhatshana lami.

7Bangikhonza ngeze; imfundiso yabo yimithetho kuphela evela ebantwini.’

8Seliyekele imiyalo kaNkulunkulu labambelela emasikweni abantu.”

9Wasesithi kubo, “Lilendledlana yenu yokufuqela eceleni imilayo kaNkulunkulu ukuze lilandele amasiko enu! 10Phela uMosi wathi, ‘Hlonipha uyihlo lonyoko’ njalo wathi, ‘Noma ngubani othuka uyise loba unina kumele abulawe.’ 11Kodwa lina lithi uma umuntu esithi kuyise loba unina: ‘Loba lusizo bani obungaluzuza kimi luli “Khobhani” (okutsho ukuthi yisipho esabelwe uNkulunkulu),

12beselisithi angamenzeli lutho uyise loba unina.

13Ngaleyondlela liyalichitha ilizwi likaNkulunkulu ngamasiko enu eliwedlulisela kuzizukulwane. Futhi lenza izinto ezinengi ezinjalo.”

14UJesu waphinda wabiza ixuku labantu wathi, “Lalelani kimi lonke, lizwisise lokhu.

15Kakulalutho olungaphandle komuntu olungamenza ‘angahlanzeki’ ngokungena kuye. Kodwa yilokho okuphuma phakathi komuntu okuyikho okumenza ‘angahlanzeki.’ 16Uma ekhona olezindlebe zokuzwa kezwe.”

17Esesukile exukwini labantu wangena endlini abafundi bakhe bambuza ngomzekeliso lo. 18Wabuza wathi, “Lilamakhanda alukhuni kangaka na? Kalikuboni yini ukuthi kakulalutho olungena emuntwini lusuka ngaphandle olungamenza ‘angahlanzeki’? 19Ngokuba kalungeni enhliziyweni yakhe kodwa luya esiswini sakhe luphinde luphume emzimbeni wakhe.” (Ngokutsho lokhu uJesu wathi konke ukudla ‘kuhlanzekile.’)

20Waqhubeka wathi: “Okuphuma phakathi komuntu yikho okumenza ‘ongahlanzekanga’.

21Ngokuba okusuka ngaphakathi, okusuka enhliziyweni, kuphuma imicabango emibi, ukufeba, ukweba, ukubulala, ukuphinga,

22ubuhwaba, umona, ubuqili, ukuxhwala, umhawu, ukugcona, ubuqholo lobuthutha.

23Zonke lezi izono ziphuma ngaphakathi zenze umuntu abe ‘ngongahlanzekanga.’ ”

Ukholo lomfazi WomSirofenikhe

24UJesu wasuka kuleyondawo waya emmangweni waseThire. Wangena endlini kodwa kafunanga ukuthi kwaziwe; kodwa wayengeke azifihle ukuthi ukhona. 25Owesifazana owayelendodakazi yakhe encinyane eyayikhwelwe ngumoya omubi wonela ukuzwa ngaye weza wayazilahla ezinyaweni zakhe.

26Umfazi lo wayengumGiriki, owazalelwa eFenikhe yaseSiriya. Wancenga uJesu ukuthi akhuphe idimoni endodakazini yakhe.

27Wamtshela wathi kuye, “Qala uyekele abantwana badle basuthe, ngokuba kakulunganga ukuthatha ukudla kwabantwana ukuphosele izinja zabo.”

28Wathi owesifazana, “Yebo, Nkosi, kodwa izinja lazo ezingaphansi kwetafula ziyadla imvuthuluka.”

29UJesu wamtshela wathi, “Ngenxa yempendulo enhle kangaka usungahamba; idimoni seliphumile endodakazini yakho.”

30Owesifazana wabuyela ekhaya wafumana umntanakhe elele embhedeni, idimoni selihambile.

Ukusiliswa Kwendoda Eyisacuthe, Eyisimungulu

31UJesu wasesuka endaweni yeThire wadabula eSidoni waze wayafika eLwandle lwaseGalile wehla waya emmangweni waseDekhapholi.

32Khonale abantu bamlethela indoda eyayiyisacuthe isehluleka lokukhuluma, bamcela ukuthi abeke isandla sakhe phezu kwayo.

33UJesu wayisusela eceleni kwexuku labantu wasefaka iminwe yakhe ezindlebeni zaleyondoda. Wasekhafula wathinta ulimi lwayo indoda. 34Wakhangela ezulwini wakhokha umoya wathi kuyo, “EFifatha!” (okutsho ukuthi, “Vuleka!”) 35Ngalokhu izindlebe zendoda zavuleka, ulimi lwayo lwatshwaphuluka yahle yaqalisa ukukhuluma kuhle.

36UJesu wabaqonqosela ukuthi bangatsheli muntu. Kodwa wathi ngokwenza njalo baqhubeka ngamandla befakaza ngakho.

37Abantu bamangala baphela amandla. Bathi, “Konke asekwenzile kuhle. Uyenza futhi lezacuthe zizwe, lezimungulu zikhulume.”